lunes, 14 de junio de 2010

E CHEGA A DESPEDIDA!

Rápido pasou o curso e, cantos libros quedan por facernos vivir mellor na biblioteca! Aproveitádeos!
Propóñovos un xogo final en que todos podedes participar, pero especialmente 3º e 4º.
Aí van as pistas... e só de novela.

Preguntádelle a Benjamín Prado se, como dicía Antonio Machado, hai Mala gente que camina (posguerra española, transición e memoria histórica); a Xavier Quiroga interrogádelle sobre se esa xente pode habitar en O cabo do mundo. Descansarán na Noite de voraces sombras? ou acordaremos no medio de La noche de los tiempos?

Sei que vos gustan as novelas de vampiros pero, permitídeme que vos conte unhas confidencias:
  • a Fortunata  de Fortunata y Jacinta foi un home quen libou o seu sangue ate quitarlle a vida mentras Galdós nos acampañaba polo Madrid que, no século XIX, seguía sendo dos Austrias. 
  • vampiros foron os caciques que en Vetusta enclaustraron a famosa La Regenta
  • e señoritos vidos a máis, ou a menos, paséanse grazas á pluma de Emilia Pardo Bazán e de Otero Pedrayo.
Eduardo Mendoza non precisa levarnos ao cine para seducirnos en: La ciudad de los prodigios, e Dickens lémbranos como o medre económico pode chegar a esquecer que o prodixio é a infancia porque a infancia é o futuro.

Vós sodes o futuro, comezade por  "remexer" na biblioteca. Preguntade, dádelles unha, e inclusive dúas ou tres oportunidades aos libros. Coñecede o mundo e a historia, recoñecede que nas vosas mans está melloralo.

Boas lecturas e boas vacacións!

miércoles, 13 de enero de 2010

SALTO NO TEMPO!

Para que non se diga que non dominamos a Historia!

Pensando no temario do alumnado de 4º e en consideración ao entusiasmo amosado no primeiro trimestre, abrimos o libro do mundo para deternos en:

STENDHAL: Vermello e Negro. Paixón e ambición nos convulsos anos do século XIX tras a caída de Napoleón. Quen non se namorou de Julian Sorel? Atoparédelo na CDU 8, Literatura.


ALEXANDRE DUMAS: O conde de Montecristo. Romanticismo e vinganza. Edmund Dantés encarcerado inxustamente ao verse implicado nunha escura trama política. Ao lonxe, no desterro..., Napoleón. Aquí atoparedes máis información do autor e da súa obra.


VÍCTOR HUGO: Os miserables. Xa sei que diredes que é moi longo, pero é igual de marabilloso. Francia, século XIX... Jean Vajean, vítima das inxustizas sociais, tan ben noveladas polo autor.

jueves, 5 de noviembre de 2009

ANIMÁNDOTE A COÑECER A ANTIGÜIDADE


Robins, G.: Las mujeres en el Antiguo Egipto. Ed. Akal.

Montet, P.: La vida cotidiana en Egipto. Ed. Temas de hoy. Rigoroso e ameno. Desvela desde os segredos das tumbas faraónicas até os aspectos máis cotiáns dos tempos de Ramsés.

Manfredi, M.: Aléxandros. Ed. Mondadori. Narra a vida do grandioso conquistador desde o seu nacemento até que chega a dominar o mundo coñecido. Ao fondo, sempre presente as ensinanzas do seu mestre Aristóteles.

Pídenos tamén este na biblioteca para saberes máis da situación da muller no mundo.

Renault, Mary: Alejandro Magno. Ed. Edhasa. Á túa disposición aquí.

Kapucisky: Viajes don Herodoto. Magnífico. Magnífico. Magnífico. Dubidades se nos gusta?

Graves, R.: Yo, Claudio. Nel atoparás as intrigas en tempo dos emperadores. Máis subxugante ca unha telenovela... e, infinitamente mellor escrita.

E miles de libros máis que nos achegan ao mundo clásico. Pero, unha última recomendación: remexe an biblio, ou mellor, utiliza o ordenador para consultar o noso catálogo, e viaxa con Ulises (A Odisea) ou contén a ira de Aquiles (A Ilíada). Hai adaptacións de Homero para todas as idades.
Ademais podedes consultar sobre mitoloxía e deleitarte coas obras de arte que inspiraron en todos os tempos (consulta nas enciclopedias especializadas e no apartado de arte).

jueves, 22 de octubre de 2009

De paseo pola prehistoria.

Achegámosvos só algúns dos títulos ambientados na Prehistoria e de escrupulosa precísión científica:

Kurtén, Björn: La danza del tigre. Plot ediciones.
Hai moitos milenios, no planeta Terra, unha especie intelixente loitaba por sobrevivir. O seu mundo vai ser invadido por outras culturas tamén intelixentes. A especie local eran os neandertais, e o seu mundo, Europa; a especie invasora... eramos nós.

Rosny, J. H.: En busca del fuego. Ed. Valdemar.
Un clásico! E non perdades a película dirixida por Jean-Jacques Annaut.

Arsuaga, J. L. e Martínez, I .: La especie elegida. Ed. Temas de hoy.
Un consello, non é unha novela, pero os directores do proxecto Atapuerca son grandes counicadores que conciben este libro para dar respostas a moitas das preguntas que vós podades facer sobre as nosas orixes. Non nos parece axeitado para o primeiro ciclo pero algún do segundo se pode animar e, como non, animade os vosos pais.

Arsuaga, J. L.: El collar del Neandertal. Ed. Temas de hoy.
Válido o exposto para o libro anterior. Quizais este é máis asequible. A min encantoume e recomendo que comecedes o achegamento á Prehistoria con este magnífico ensaio.

miércoles, 21 de octubre de 2009

Historia para todos e todas.


Se vos gustan os cómics, de seguro que vos ides divertir e aprender con estes libros que hoxe recomendamos para todos os cursos: 1º, 2º, 3º e 4º da ESO.


Historia de Galicia

Historia Universal


Atoparédelos na CDU 9, no andel de Historia. O seu autor é Pepe Carreiro, máis coñecido como ilustrador non só de banda deseñada, senón tamén de xénero narrativo.

miércoles, 14 de octubre de 2009

BENVIDA AO NOSO BLOG DE CIENCIAS SOCIAIS

Dámovos a nosa cálida benvida ao noso blog de Ciencias Sociais do noso Instituto. Nel queremos propoñervos itinerarios lectores para nosa área.
En sucesivas entradas comentaremos lecturas relacionadas coa programación da nosa asignatura en cada curso da ESO. Dentro da selección presentamos textos axeitados a cada idade e que abordan dende a ficción distintas etapas da historia do home ou se ambientan en cidades ou pobos que nos axudan a coñecer mellor a xeografía. Pensamos que poden ser un estímulo e un complemento das explicacións teóricas e poden axudarvos a viaxar no tempo e no espazo.
Confiamos que atopedes interesante esta iniciativa que se suma a dos outros Departamentos e que se enlazan co noso blog da Biblioteca.